Blogger Tips and TricksLatest Tips And TricksBlogger Tricks

సోమవారం, మే 03, 2021

లక్ష్మీ స్తుతి! [గర్భకవిత్వము]

 మిత్రులందఱకు నమస్సులు!


లక్ష్మీ స్తుతి!
[గర్భకవిత్వము]



ఆటవెలఁది గర్భ తేటగీతి మఱియు ద్విపద, మత్తకోకిలా గర్భ సీసము

సీసము:
క్షీరసాగరపుత్రి! శ్రీద! విశిష్ట! శ్రీ!
        కమలాసనా! పద్మ! కంజహస్త!
సారసాక్షి! త్రిలోక సన్నుత! సారసా
        నన! పార్థివీ! కరుణామనస్వి!
మారమాత! మనోజ్ఞ! మాధవి! మాన్య! భా
        గ్యవివర్ధినీ! నళినాయతాక్షి!
దూర దైన్య విశేష! దూషితదోష! శౌ
        రి హృదిస్థితా! సురబృంద వంద్య!
తేటగీతి:
ధరణి మనుజులకును వరమరయ నిడుచు,
ననిశ మరసికొనుచు, హర్షమమర నిడుచు,
హరియురస్థితవయి, స్థిరతరగ వెలుఁగు,
జనని! కమల! లక్ష్మి! శరణు శరణు నీకు!

పై సీసపద్యములొ దాఁగియున్న ఇతర పద్యములు ఈ క్రింద జూపఁబడుచున్నవి:

గర్భిత మత్తకోకిల:
క్షీరసాగరపుత్రి! శ్రీద! విశిష్ట! శ్రీ! కమలాసనా!
సారసాక్షి! త్రిలోక సన్నుత! సారసానన! పార్థివీ!
మారమాత! మనోజ్ఞ! మాధవి! మాన్య! భాగ్యవివర్ధినీ!
దూర దైన్య విశేష! దూషితదోష! శౌరి హృదిస్థితా!

గర్భిత ద్విపద:
క్షీరసాగరపుత్రి! శ్రీద! విశిష్ట!
సారసాక్షి! త్రిలోక సన్నుత సార!
మారమాత! మనోజ్ఞ! మాధవి! మాన్య!
దూర దైన్య విశేష! దూషితదోష!

గర్భిత ఆటవెలఁది:
ధరణి మనుజులకును వరమరయ నిడుచు,
ననిశ మరసికొనుచు, హర్షమమర
హరియురస్థితవయి, స్థిరతరగ వెలుఁగు
జనని! కమల! లక్ష్మి! శరణు శరణు!



స్వస్తి

’మధురకవి’ గుండు మధుసూదన్, శేషాద్రిహిల్స్, ఓరుగల్లు



వ్యాఖ్యలు లేవు:

వ్యాఖ్యను పోస్ట్ చెయ్యండి