నిషిద్ధాక్షరి: నవ్యాంగ్ల వత్సర శుభాకాంక్షలు! (శ. ష, స - లు లేకుండా)

మిత్రులందఱకు
నవ్యాంగ్లవత్సర శుభాకాంక్షలు!

ఇమ్ముగ భోగభాగ్యములవెన్నియొ యిచ్చుచు జీవనమ్మునన్

నెమ్మినిఁ బెంచుచున్మిగుల నేత్రపుఁ బర్వము లేర్పఱింపఁ దా

నిమ్మెయి వచ్చు నూత్నమగు నేఁడిదె చూడుఁడు రెండువేల పం

దొమ్మిది క్రొత్తకోర్కెలను తొల్తొలిఁ దీర్చఁగ నందకత్తెయై!

స్వస్తి

నిషిద్ధాక్షరి: ద్విత్వ సంయుక్తాక్షరముల నిషేధం...సూర్యోదయ వర్ణనము...కందపద్యంలో...

తేది: డిసెంబర్ 07, 2014 నాటి శంకరాభరణంలోని నిషిద్ధాక్షరి శీర్షికన ఈయబడిన

అంశం- సూర్యోదయ వర్ణనము

నిషిద్ధాక్షరములు - ద్విత్వ సంయుక్తాక్షరములు

ఛందస్సు - కందము

దీనికి నేను వ్రాసిన పద్యము

తూరుపు దెస నరుణ కిరణ
ధారణుఁడై చిఱునగవుల తపనుఁ డడుగిడన్;
ధారుణి పొంగుచు ఘన కా
సార కమల వికచ హాస సౌరభము లిడెన్!

నిషిద్ధాక్షరి: రేఫము, శకటరేఫము నిషిద్ధము...రామాయణ ప్రాశస్త్య వర్ణన...తేటగీతి పద్యంలో...

తేది: నవంబర్ 13, 2014 నాటి శంకరాభరణంలోని నిషిద్ధాక్షరి శీర్షికన ఈయబడిన

అంశం- రామాయణ ప్రాశస్త్యము

నిషిద్ధాక్షరములు - రేఫము, శకటరేఫము (ర,ఱ లు)

ఛందస్సు - తేటగీత

దీనికి నా రెండు పూరణములు:

(1)

తపసి వాల్మీకి లిఖిత సత్కావ్యనేత,

సీతతో, లక్ష్మణునితో వసింప నడవి,

దశముఖుఁడు సీతఁ గొంపోవ, స్పశముఁ జేసి,

వాని వధియించి, చెలిఁగొని, పావనుఁడయె!

(2)

పుట్టపుట్టువు కన్నట్టి పొత్తపుఁ బతి

జన్నమునుఁ గాచి, విల్తున్మి, జానకి మను

వాడి, వనికేగి, యిల్లాలి బందెవట్టు

వాని నొంచి, గేహినిఁ గొని, పావనుఁడయె!

నిషిద్ధాక్షరి: పవర్గాక్షర నిషేధం...పద్మవ్యూహంలో అభిమన్యుఁడు...నచ్చిన ఛందం...

తేది: నవంబర్ 07, 2014 నాటి శంకరాభరణంలోని నిషిద్ధాక్షరి శీర్షికన ఈయబడిన

అంశం- పద్మవ్యూహంలో అభిమన్యుఁడు

నిషిద్ధాక్షరాలు - పవర్గాక్షరాలు (ప,ఫ,బ,భ,మ)

ఛందస్సు - నచ్చిన ఛందంలో

పద్యం వ్రాయమనగా

నేను వ్రాసిన శార్దూలవిక్రీడిత వృత్తము

(కౌరవులు పద్మవ్య్హూహమం దభిమన్యుని కుటిల తంత్రముతో సంహరించిన ఘటనకు విస్మయము చెందిన పాండవసేన మనోవేదన)

శార్దూలవిక్రీడితము:

"చక్రవ్యూహ సువేశితుం దతధనుర్జ్యాసక్త నారాచ ధా

రాక్రాంతాంచిత శత్రు నిర్జిత యతద్ద్రాఘిష్ఠ సన్నద్ధ యు

ద్ధ క్రీడావిహరద్ఘనవ్రతయుతుం దచ్ఛౌరి స్వస్రీయుఁడౌ

నా క్రీడిద్రుహుఁ గౌరవుల్ గుటిల తంత్రానన్విఘాతింతురా?"

నిషిద్ధాక్షరి: కవర్గాక్షర నిషేధం...కాకాసురవృత్తాంతం...నచ్చిన ఛందస్సులో...

తేది: నవంబర్ 01, 2014 నాటి శంకరాభరణంలోని

నిషిద్ధాక్షరి శీర్షికన

కవర్గాక్షరాలు లేకుండా

కాకాసుర వృత్తాంతాన్ని గురించి

నచ్చిన ఛందంలో పద్యం వ్రాయమనగా

నేను వ్రాసిన తేటగీతిమాలిక...

దుష్ట వాయస రూప దైత్యుండు మైథి

లిని వ్యధితఁ జేయ, రాముండు వ్రీతి దర్భఁ

జేత నంది బ్రహ్మాస్త్రముం బూత మంత్ర

సహితనున్ విడువ, నదియు సాల్వుఁ జంప

వెంటఁబడఁ బరువెత్తుచు భీతిఁ ద్రిభువ

నమ్ములను సంచరించుచు "నన్నుఁ బ్రోవు"

మంచుఁ బిలువ, నెవ్వండు నోమను, దరిఁ జనఁ

దెంపు సేయనుఁ బుయిలోడఁ, దెలిసి వాఁడు

మఱలి శ్రీరాము "శరణ మి"మ్మనుచు వేడ,

"దానిని మఱలింపను నసాధ్య"మ్మటంచు,

నతని దేహాంశ మిచ్చిన నదియు శాంతిఁ

బొందునన, నేత్రమును నిచ్చి, పోయినాఁడు,

తనదు తప్పును మన్నింపు మనుచు వేడి!!

(ఇది కాకాసురవృత్తాంతము)

శుభం భూయాత్

నిషిద్ధాక్షరి: శ్రీరామ పట్టాభిషేకం

తేది: అక్టోబర్ 26, 2014 నాటి శంకరాభరణంలోని నిషిద్ధాక్షరి శీర్షికన శ్రీరామ పట్టాభిషేకాన్ని వర్ణిస్తూ తేటగీతి పద్యంలో

మొదటిపాదాన్ని ‘రా’తో ప్రారంభించాలి...రెండవ అక్షరంగా ‘మ’ నిషిద్ధం

రెండవపాదాన్ని ‘భ’తో ప్రారంభించాలి...రెండవ అక్షరంగా ‘ర’ నిషిద్ధం

మూడవపాదాన్ని ‘ల’తో ప్రారంభించాలి...రెండవ అక్షరంగా ‘క్ష్మ’ నిషిద్ధం

నాలుగవపాదాన్ని ‘శ’తో ప్రారంభించాలి...రెండవ అక్షరంగా ‘త్రు’ నిషిద్ధం

నిషిద్ధాక్షరాలు కేవలం పాదంలో రెండవస్థానానికే పరిమితం. పద్యంలో మిగిలిన స్థానాలలో వాడవచ్చుననగా

నేను రాసిన తేటగీతి పద్యము:

రాజసింహాసనమున శ్రీరామునపుడు

భక్తి భరతుండు పట్టాభిషిక్తుఁ జేసి,

లలిత మర్యాదు లక్ష్మణు నలరఁ జేసి,

శస్త్రి శత్రుఘ్ను నానంద సదనుఁ జేసె!

నిషిద్ధాక్షరి: ల,ళల నిషేధంతో...ఊర్మిళాదేవి నిద్రను...నచ్చిన పద్యంలో...

తేది: అక్టోబర్ 20, 2014 నాటి శంకరాభరణంలోని నిషిద్ధాక్షరి శీర్షికన

"ల. ళ" లు లేకుండ

ఊర్మిళాదేవి నిద్రను గురించి

నచ్చిన ఛందంలో పద్యం వ్రాయమనగా

నేను వ్రాసిన తేటగీతి:

జనక భూవిభు నౌరస తనయ...తనదు

భర్త సౌమిత్రి, యన్నవెంబడి వనమ్ము

నకును నరిగి, తిరిగివచ్చు నంతదాఁక,

పట్టువిడువక నిద్రించినట్టి సాధ్వి!

నిషిద్ధాక్షరి: ’ర’కార నిషేధం...రామ రావణ యుద్ధ వర్ణన...కందపద్యంలో...

తేది: అక్టోబర్ 14, 2014 నాటి శంకరాభరణంలోని నిషిద్ధాక్షరి శీర్షికన

‘ర’ అన్న అక్షరాన్ని ఉపయోగించకుండా

రామ రావణ యుద్ధాన్ని వర్ణిస్తూ

కందపద్యం వ్రాయమనగా
నేను రాసిన పద్యం:

సీతాపతిహస్తతృణత

శాతపృషత్కోద్విఘాతసంహతిశక్తిన్

దైతేయపతియె హతుఁడయె

సీతాస్తేయాత్యయకృతశిక్షితుఁడగుచున్!!

నిషిద్ధాక్షరి: భరతమాత స్తుతి...

తేది: అక్టోబర్ 08, 2014 నాటి శంకరాభరణంలో

నిషిద్ధాక్షరి శీర్షికన

మొదటిపాదంలో కవర్గాక్షరాలను,

రెండవపాదంలో చవర్గాక్షరాలను, 

మూడవపాదంలో తవర్గాక్షరాలను,

నాల్గవపాదంలో పవర్గాక్షరాలను

ఉపయోగించకుండా

భారతమాతను స్తుతిస్తూ

నచ్చిన ఛందంలో పద్యం వ్రాయమనగా

నేను రాసిన తేటగీతి మఱియు సీసపద్యములు:

(౧)

తేటగీతి:

శిరము హిమధామ సుందర వర మహాద్రి!

పాదముల్ మహాలవణాబ్ధి! భవదుపమిత

రూపవైశాల్య మరసి, కారుణ్యశీలి!

వైరులుం గొనఁ, ద్రోలిరి వీర సుతులు!

(౨)

సీ.

అమ్మ భారతమాత! హారతులందింతు

....నంది యానందమ్ము నందఁజేయ,

మమ్ము దోషములేని మార్గాన నడిపియు

....నుత్తమోత్తమ సుతు లుత్తములని

మెచ్చుచుఁ బరరాజ్య మేలువారలు వేగ

...మిటకడుగిడి చూచి మేర మఱచి

యానంద వశులయి యాహా యటంచును

....నిన్నుఁ గీర్తించఁగా నిఖిల జగతి

గీ.

లోనఁ బేరెన్నఁబడ నెప్డు భానుమండ

లోన్నత ప్రభా సహిత విలోకనములఁ

గరుణఁ జూచుచు మమ్ముఁ బ్రకట విశాల

జీవులనుఁ జేయ వినతి సుస్నిగ్ధవదన!!

(సీసపాదములవలెనే...గీతపాదములలోనను పై నియమ మఱయునది)

నిషిద్ధాక్షరి: సరళాక్షర నిషేధం...గాంధీజీ స్తుతి...నచ్చిన ఛందస్సులో...

తేది: అక్టోబర్ 02, 2014 నాటి శంకరాభరణంలోని

నిషిద్ధాక్షరి శీర్షికన

సరళాక్షరము(గ-జ-డ-ద-బ)లను ఉపయోగించకుండా

గాంధీజీని స్తుతిస్తూ

నచ్చిన ఛందంలో పద్యం వ్రాయమనగా

నేను రాసిన

సీసపద్యము మఱియు తేటగీతి

మదీయ ప్రథమ పూరణము::
సీ.
నెత్తిపై పిలకతో, నిర్మలమ్మౌ ముఖ
      మ్మున ధీరశాంతముల్ మొనయ నిచట
నల తెల్లవారి కార్యావర్త పరిహార్య
      మౌటకై నీ వహింసాస్త్రము ధరి
యించియు నని సేసి, యేకమౌనటు సేయ
      ప్రాంతీయులను భవ్యవాక్ప్రతతుల
నాసేతుశీతాచలాంతర సంచారి
      వైతి మేల్కొలుప నీ వనవరతము

గీ.
తెల్లవారల పాలన తెల్లవాఱ
నీ వహింసాయుత సమర నేతవయ్యు
భారతీయ స్వతంత్రతా వర్తనకయి
హే భరతమాత సత్పుత్ర, హితవర, పిత,
తెల్లవారి నంపితివి మా యుల్ల మలర!!


మదీయ ద్వితీయ పూరణము:
తే.గీ.

శాంత్యహింసాయుధధుర్య! సత్యకోప!
శ్వేతముఖపలాయిత! చిత్రవేషధారి!
భరతమాత సత్పుత్రక! భరతవర్ష
పిత! మహాత్మ! నమోఽస్తుతే విమల చరిత!!