Blogger Tips and TricksLatest Tips And TricksBlogger Tricks

ఆదివారం, మే 16, 2021

ఆఱవ పద్యము: శ్రీ కేశవ కంద గీతి గర్భ చంపకోత్పల శతకము [గర్భకవిత్వము]

ఓం నమో భగవతే వాసుదేవాయ


శ్రీ కేశవ కంద గీతి గర్భ చంపకోత్పల శతకము
[గర్భకవిత్వము]

ఆఱవ పద్యము:

చంపకమాల:
రవమెసలారఁగా సురలు రాక్షసు లా యహిఁ జుట్టి యద్రి, క
ర్మువు వనధిన్ వెసన్ దరుచ; మోయక, క్రుంగఁగ ధాతుభృత్తు; చే
యవె ససిఁ గావ, మేల్; వర జయమ్మెసఁగన్ ఢులివై వహించి, యీ
యవె సుధనే! నతుల్, జనుల నారసి, ప్రోచిన శౌరి! కేశవా! 6

గర్భిత కందము:
ఎసలారఁగా సురలు రా
క్షసు లా యహిఁ జుట్టి యద్రి, కర్మువు వనధిన్
ససిఁ గావ, మేల్; వర జయ
మ్మెసఁగన్ ఢులివై వహించి, యీయవె సుధనే! 6

గర్భిత తేటగీతి:
సురలు రాక్షసు లా యహిఁ జుట్టి యద్రి,
తరుచ; మోయక, క్రుంగఁగ ధాతుభృత్తు;
వర జయమ్మెసఁగన్ ఢులివై వహించి,
జనుల నారసి, ప్రోచిన శౌరి! కేశ! 6




స్వస్తి
’మధురకవి’ గుండు మధుసూదన్, శేషాద్రిహిల్స్, ఓరుగల్లు



వ్యాఖ్యలు లేవు:

వ్యాఖ్యను పోస్ట్ చెయ్యండి