Blogger Tips and TricksLatest Tips And TricksBlogger Tricks

శనివారం, మే 14, 2016

బాలల నీతి పద్య కథలు: మూర్ఖునితో ప్రయాణం...



ఒక్కనాఁ డొక్క వణిజుండు ప్రక్క యూర
సరుకుఁ గొనితేరఁ జనుచును, సఖులు తోడు
లేక, యొక మూర్ఖుఁ దోడుగా స్వీకరించి,
కలసి పయనింపసాఁగెను గడు ముదమున! 1


అట్లు పయనించుచుండఁ జీఁకట్లు ముసిరెఁ
గాని, చేరఁగాఁ జనునట్టి గమ్య మింక
రాకపోవుట; యదియె యరణ్య మౌట;
వణిజుఁ డెంతయు భయపడెఁ బథమునఁ జన! 2


’అడవి దారినిఁ జోర భయమ్ము చేత,
ముందు కేఁగుట మేలు కానందు వలన,
నేదొ యొకచోట వసియింత మిపు’ డని, మునుఁ
గాంచఁ బ్రాఁతదౌ నొక గుడి కానుపించె! 3


ఇద్ద ఱా గుడి లోనికి నేఁగ; మొఱకు
మండపమ్మున నిద్రించుచుండ; వణిజుఁ
డంత ప్రతిమ వెన్కకుఁ జని, యటనె తాను
నిద్ర పో సాఁగె నలసట నింగి కెగయ! 4


కొలఁది రాత్రాన దొంగలు గుడికి వచ్చి,
తాము దోచిన సొమ్ము నంతయునుఁ బంచు
కొనఁగఁ బూనియు, మండపమునకుఁ జనఁగ,
మూర్ఖుఁ డచ్చటఁ గనిపించె మ్రుచ్చులకును! 5


వాని దరిఁ జేరి వారలు పలికి రిట్లు,
"వీఁడు నిరుపేద కాఁబోలు; తోడు లేక
యిచట నిద్రించె!" ననఁగ, వాఁ "డేమి, నేను
బీదవాఁడనె? నా యొద్ద లేదె ధనము? 6


చూడుఁ డిద్దియ!" యనుచునుఁ జూపెఁ దాను
నొక్క వరహాను తన రొండి నుండి తీసి!
దానిఁ జూచియు వారలు తక్కలి గొని,
పూని పరికించి చూడంగ, మూర్ఖుఁ డపుడు; 7


"నిక్క మైనట్టి వరహాయె! తక్క౯మేల?
దీనిఁ దెలుపంగ వలెనన్న ది క్కతండె!
యదివొ! నిద్రించుచున్నట్టి యాపణికుని
నిద్ర లేపి యడుగుఁ డయ్య! నిజమొ, కాదొ!!" 8


అనిన మూర్ఖుని మాటల నాలకించి,
సంతసమ్మున వణిజుని సరసకుఁ జని,
లేపి, ధనమంతయును మ్రుచ్చిలించి, చనిరి;
తమ యదృష్టమ్ము బాగున్న దనుచు వారు! 9


వర్తకుఁడు తాను మునుకొన్న పని నిలువఁగ;
ధనము నంతయుఁ జోరులు తస్కరింప;
నేడ్చుచుం దన యింటికి నేఁగ మఱలె!
కాన, మూర్ఖుని తోడ్పాటు నూనఁ దగదు!! 10



స్వస్తి


2 కామెంట్‌లు:

  1. చిన్నపిల్లలకు బానే ఉంటుంది.

    రిప్లయితొలగించండి
    రిప్లయిలు
    1. రమణ గారూ...నమస్సులు! నేను రాస్తున్నది పిల్లకోసమేనండీ! భావి భారత పౌరులకు! తెలుఁగుఁ బద్యంబు నిత్యమై తేజరిల్లు!

      తొలగించండి