దత్తపద్యారంభము: కవివర నీ కవిత్వమునఁ గాంతుము...

తేది: సెప్టెంబర్ 28, 2015 నాటి శంకరాభరణంలోని పద్యరచన శీర్షికన ఈయబడిన దత్తవాక్యమునకు నా పద్యము

కవివర నీ కవిత్వమునఁ గాంతుము స్వచ్ఛ వియన్నదీ ప్రవా

హ వర మనోజ్ఞ తైర్థ్యము! విహాయస వీథ్యుపవిష్ట వాత్యమున్!

నవక వచోఽమృతార్థక నినాహ్యము! శబ్ద విశేష భూషితో

ద్భవ యమకాది వేష్యము! సువాక్య రసార్ణవ నవ్య కావ్యమున్!

సమస్య: వినాయకుని సాఁగనంప విచ్చేసె రహీమ్!

తేది: సెప్టెంబర్ 27, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(స్వాతంత్య్ర సంగ్రామ తొలి ఖైదీ మౌల్వీ సయ్యద్ అల్లాఉద్దీన్‍ను నాంగ్లేయులు కారాగారమున నుంచుటకుం దీసుకొని వెడలుచుండ, నతనిని సాఁగనంపుటకై యతని యనుచరుఁడు రహీమ్ విచ్చేసిన సందర్భము)

ఘనముగ స్వాతంత్ర్యమ్మునుఁ
గొన, సమరము సేయ, దొరలు కోరి చెఱనిడన్
మునుకొన, వెడలెడు నా మౌ
ల్వి నాయకుని సాఁగనంప విచ్చేసె రహీమ్!

సమస్య: పదునెనిమిది పదునెనిమిది పదునెనిమిదియే!

తేది: సెప్టెంబర్ 26, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణములు

నా మొదటి పూరణము:
ఇదె యష్టాదశ వర్ణన,
మిదె తత్సంఖ్యా పురాణ, మిదె స్మృతి సంఖ్య,
మ్మిది ధాన్య, జాతి, విద్యయుఁ
బదునెనిమిది పదునెనిమిది పదునెనిమిదియే!

(ఈ పూరణమున ద్వితీయ పాదాంతమందు "సంఖ్యమ్ము" సంఖ్యగాఁ గాక, "యుద్ధ"మను నర్థము నిచ్చుచున్నదని డా. విష్ణునందన్ గారు...
[సుకవి శ్రీ గుండు మధుసూదన్ గారి మధురమైన పూరణల్లో ఒకానొక పూరణలో ఒక చోట సంఖ్యా శబ్దాన్ని సంఖ్యమని అకారాంత నపుంసక లింగముగా అని వాడినట్లున్నారు, ' లెక్క ' అనే అర్థంలో సంఖ్యా శబ్దం నిరంతరాకారాంత స్త్రీ లింగమే ! అకారాంత నపుంసకమైతే యుద్ధమనే రూఢి !]
...అని తెలిపినందున, సవరించిన పూరణము నీ దిగువన నిచ్చుచున్నాను)

సవరించిన నా పూరణము:
ఇదె యష్టాదశ వర్ణన,
మిదె తత్సంఖ్యా పురాణ, మిదె స్మృతి గణణ,
మ్మిది ధాన్య, జాతి, విద్యయుఁ
బదునెనిమిది పదునెనిమిది పదునెనిమిదియే!



నా రెండవ పూరణము:

(శ్రీ కంది శంకరయ్యగారిచ్చిన సమస్యల సంఖ్య దీనితో పదునెనిమిది వందల సంఖ్య యైనందున)
పదునౌ సమస్య లివియుం
బదునెనిమిది వందలయ్యెఁ బరిశీలింపన్
బదుగు రివి మెచ్చు వందలు
పదునెనిమిది పదునెనిమిది పదునెనిమిదియే!

నా మూఁడవ పూరణము:
పదపడి చేయంబోకుఁడు
పది యేఁడుల పాపల కిల వైవాహికముల్
సుదతులకుఁ బెండ్లి వయసది
పదునెనిమిది పదునెనిమిది పదునెనిమిదియే!

దత్త పద్యారంభము: ఎక్కడి కేఁగువాఁడ? నిపు డెవ్వని వేడుదు?

తేది: సెప్టెంబర్ 26, 2015 నాటి శంకరాభరణంలోని పద్యరచన శీర్షికన ఈయబడిన దత్తవాక్యమునకు నేను రాసిన పద్యము

(హరిభక్తుఁడగు నంబరీషునిపైఁ గినిసిన దుర్వాసమహర్షి కృత్యనుం బ్రయోగింపఁగఁ, గోపించిన శ్రీహరి, దుర్వాసునిపైఁ జక్రాయుధమునుం బ్రయోగింపఁగ, దానినుండి తప్పించుకొను నుపాయ మెఱుంగక తనలోఁ దా నిట్లనుకొని చింతించిన వైనము నిట ననుసంధానించుకొనునది)

ఎక్కడి కేఁగువాఁడ? నిపు డెవ్వని వేడుదుఁ? జక్ర మీ విధిన్

జక్కఁగ నాదు వెంటఁబడె! శంభుఁ డజుండును బ్రోవ మందురే!

నిక్కపు విష్ణుభక్తునకు నేనిటు చేసితిఁ గీడు! పక్కి రా

జక్కిదొరా! బిరాన ననుఁ జక్రము బారిని నుండి కావరా!!

ఆహ్వానం!

ఈ శతావధానములో నిషిద్ధాక్షరి మరియు సమస్యా పూరణములు 

నిర్వహించుట కొరకు సమర్థవంతమైన పృచ్ఛకులు కావాలి.

పాల్గొను పృచ్ఛకులందరికి జనవరి 6,7,8,9, 2016, నాలుగు రోజులు 

ఉచిత భోజన వసతులు కల్పించ బడుతాయి. 

విరములకు

డా || నలవోలు నరసింహా రెడ్డి 

9848898515, 9133072535.

సమస్య: నలుగురితోఁ దిరుగు పడఁతి నా యిల్లాలే!

తేది: సెప్టెంబర్ 25, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

నెలఁతల సఖ్యత కొఱకయి
లలనా మండలి నొకండు లలి నడుపం దాన్
బొలుపార నగుచుఁ బడఁతులు
నలుగురితోఁ దిరుగు పడఁతి నా యిల్లాలే!

సమస్య: భీముఁ డతిభీకరమ్ముగ భీముఁ జంపె!

తేది: సెప్టెంబర్ 13, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(శంకరుఁడు భీమాసురునిఁ జంపిన కథ నిట ననుసంధానించుకొనునది)

ఆ సుదక్షిణ దంపతు లార్తితోడ

హరునిఁ బూజింప, భీముండు నపహసించి,

"ఱాయి కాచునే" యని, కత్తి వ్రేయఁ, ద్రిపుర

భీముఁ డతిభీకరమ్ముగ భీముఁ జంపె!

సమస్య: ధర్మమార్గముఁ దప్పఁడు దానవుండు!

తేది: సెప్టెంబర్ 12, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

దానవుండయ్యు ప్రహ్లాదుఁ డనవరతము

హరిని మనమునఁ దలఁచుచు, నర్భకులకుఁ

బరఁగ హరిభక్తిఁ గలిగించె! భక్తిచేత

ధర్మమార్గముఁ దప్పఁడు దానవుండు!!

సమస్య: అన్నదానమ్ము సేయువా రధము లిలను!

తేది: సెప్టెంబర్ 24, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

తనకు మున్నుఁ బుట్టినవాఁడు తన కెవరగు?

క్షేమమునుఁ గూర్పఁ గర్ణుండు నేమి సేయు?

హితముఁ గొని, కీడుఁ జేయువా రెవ్వ రుర్వి?

నన్న, దానమ్ము సేయు, వా రధము లిలను!

సమస్య: కోడలా నాదు పతి నీకుఁ గొడుకు గాదె!

తేది: సెప్టెంబర్ 23, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(సాగరునకు భార్యయైన గంగకుఁ జంద్రుఁడు, శివుఁడు నిద్దఱునుం గొడుకు వరుస యౌదురు. విష్ణు పాదోద్భవయైన గంగ పార్వతికిం గోడలు వరుస కావలెను. ఈ వరుసల ననుసరించి పార్వతి గంగతోఁ జమత్కరించు సందర్భము)

"సాగరున కీవు వలచిన సతివి; మఱియుఁ

జంద్రుఁడే నాకు మఱఁది; యా శంకరునకు

నతఁడు తమ్ముఁడు; విష్ణువౌ నన్న నాకుఁ;

గోడలా! నాదు పతి నీకుఁ గొడుకు గాదె!!"

సమస్య: రాములందు గొప్ప రాముఁ డతఁడు!

తేది: సెప్టెంబర్ 21, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణములు

నా మొదటి పూరణము:

ఒక సతి యొక మాట యొక బాణ నినదుఁడై

యుండుఁ గాని యొండు నువిదఁ గనఁడు;

రమణిఁ జెఱనుఁ బెట్టు రావణా దీంద్రియా

రాములందు గొప్ప రాముఁ డతఁడు!

***      ***      ***

నా రెండవ పూరణము:

పరశురాముఁడు, మఱి, బలరాముఁడైనచో

జననిఁ జంపువాఁడె! యని విముఖుఁడె!

మాతృహంత క్షాత్రమార్గోత్సృజులగు నా

రాములందు గొప్ప రాముఁ డతఁడు!!

(ఈ పై పూరణలో అన్వయం బాగా లేనందున, దశరథరాముని ప్రస్తావన లేనందున...

దానిని ఈ క్రింది విధంగా సవరిస్తున్నాను)

సవరించిన పూరణము:

పరశురాముఁడు, మఱి, బలరాముఁడైనచో

జననిఁ జంపువాఁడె! యని విముఖుఁడె!

తప్పు లేనివాఁడు దశరథ రాముఁడే!

రాములందు గొప్ప రాముఁ డతఁడు!!

దత్తపద్యారంభము: "మనసిజ పుష్పబాణములు మాటికిఁ గ్రుచ్చఁగ..."

తేది: సెప్టెంబర్ 21, 2015 నాటి శంకరాభరణంలోని పద్యరచన శీర్షికన ఈయబడిన దత్తపద్యారంభము "మనసిజ పుష్పబాణములు మాటికిఁ గ్రుచ్చఁగ..." నను వాక్యమునకు నేను చేసిన పూరణము

మనసిజ పుష్పబాణములు మాటికిఁ గ్రుచ్చఁగ మన్మథార్తయై
తనువు ప్రతాపనమ్ముఁగొనఁ దద్దయుఁ దాళఁగలేక తారయే
చని తుహినాంశు మ్రోలఁ దన స్వాంత గతస్థ మనోరథమ్ముఁ దీ
ర్పను బిడియమ్మువీడి వెస రమ్మనెఁ దేల్పఁగ రాసకేళికిన్!

సమస్య: వాసుదేవునిఁ గంసుఁడు పట్టి చంపె!

తేది: నవంబర్ 29, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము 

(దేవకీదేవి కన్న యెనమండ్రు సంతానమందు నార్వురనుం గంసుఁడు చంప, సప్తమ గర్భము పతనమై యాదిశేషుని యంశయగు సంకర్షణునిగ [బలరాముఁడు] రోహిణీగర్భగతుఁడాయె, నష్టమ గర్భము శ్రీకృష్ణుఁడని తెలియునది)



తననుఁ జంపెడి శిశువునుఁ దానె చంపఁ
గోరి,  దేవకి కన్నట్టి కూర్మి సుతుల
నార్వుర వసుదేవుఁడిడఁగ, నందియుఁ, బ్రతి
వాసుదేవునిఁ గంసుఁడు పట్టి చంపె! (1)


************************************************************


మరణ భయమునఁ గ్రుద్ధుఁడై  వరుసఁగఁ బ్రతి
వాసుదేవునిఁ గంసుఁడు పట్టి చంపె!
యోగమాయయుఁ దర్జించె "నొక్క బాలుఁ
డంతమొందింప వ్రేపల్లియనుఁ గలఁ" డని! (2)

సమస్య: భక్షించెను గోవుఁ జంపి పాప మెటు లగున్

తేది: సెప్టెంబర్ 18, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

కుక్షింభరి గోవొక వని
నక్షయ ఘాసమునుఁ దినఁగ, నవ్వేళనె హ
ర్యక్ష మొకం డట క్షుథఁ జని,
భక్షించెను గోవుఁ జంపి! పాప మెటు లగున్?

(గోవు తన యాహారమైన ఘాసము నెటుల భక్షించెనో, యటులనే శార్దూలమును తన యాహారమైన గోవునుం జంపి భక్షించుట పాపము కాదుకదా! యని యనుట)

సమస్య: కొఱవి తోడనుఁ దలగోకి కొనుట మేలు!

తేది: సెప్టెంబర్ 16, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(తన మాట వినక సీతనుఁ జెఱపట్టిన రావణునితో విభీషణుఁడు పలికిన పలుకులు)

"అన్న! వినుమన్న! యిఁకనైన నతివ సీత

నాదరముతోడ నిచ్చి స్నేహమ్మడుగుము!

వానరయుత శ్రీరాముతోఁ బగల కన్నఁ

గొఱవి తోడనుఁ దలగోకి కొనుట మేలు!!"

దత్త పద్యారంభము: కురునృప! పాండునందను లకుంఠిత...

తేది: సెప్టెంబర్ 18, 2015 నాటి శంకరాభరణంలోని పద్య రచన శీర్షికన ఈయబడిన "కురునృప పాండునందను లకుంఠిత..." అను పోతన భాగవతం లోని (3-98) పద్య ప్రారంభమును కొనసాగిస్తూ నచ్చిన అంశముతో పద్యమును వ్రాయుమనగా నేను వ్రాసిన రెండు పద్యములు

(1)

కురునృప! పాండునందను లకుంఠిత శౌర్య సుధీ బలాఢ్యులై

నిరుపమ యుద్ధనైపుణిని నీదు సుత ప్రకరమ్ములన్ వడిన్

గరము దురంత దుఃఖ మిడు కయ్యము నందునఁ గూల్చుచుండఁగన్

ద్వరితగతిన్ యమున్ దమకు దాఁపునఁ గాంతు రధర్మవర్తనుల్ !!

(2)

కురునృప! పాండునందను లకుంఠిత సత్యపరాక్ర మోన్నతుల్

దురమునఁ గృష్ణు సాయమున దుర్జనులౌ భవదీయ సూనులన్

వరుసగఁ జంపఁ బూని యమ బాధలఁ ద్రోయుచుఁ గాలు పాలికిన్

దరుమగ, నీకుఁ దోడెవఁ? డధర్మ నిఘృష్వము వీడు మిమ్మెయిన్ !

.

దత్త పద్యారంభము: "ఎందుల కిన్ని బాధల సహింతువు..."

తేది: సెప్టెంబర్ 11, 2015 నాటి శంకరాభరణంలోని పద్య రచన శీర్షికన ఈయబడిన పద్య ప్రారంభము "ఎందుల కిన్ని బాధల సహింతువు..." అను వాక్యమునకు కొనసాగింపుగా నేను పూరించిన పద్యము...

(సత్యవంతుని ప్రాణములఁ గొనిపోవుచుండఁగాఁ దన్ను వెంబడించిన సావిత్రితో యముఁడు పలికిన మాటలు)

"ఎందుల కిన్ని బాధల సహింతువు? మద్రసుతా! యముండ నే!

నిందునిభాస్య! నీ మగని నిట్టుల నేఁ గొనిపోవ, నీ విటుల్

సందడిఁ జేయుచున్ వెత వసమ్మున వెంటఁ బడంగ రాదు! కొ,

మ్మింద, వరమ్ము నిత్తు, నిఁక, నీశుని ప్రాణముఁ దక్కఁ గోరి, యే

కొందలపాటు లేక యిఁకఁ గూర్చుమ నాకుఁ బ్రమోద మి" ప్డనన్,

ముందుగఁ గోరె స్వశ్వశురు పూర్వపు వైర్యపహార్య రాజ్యమున్,

సందియ మింక లేక వరుసన్ గనె మామను లబ్ధచక్షుగన్!

గుందుచు వెన్కఁ బోవ, హరి గొబ్బున నింకొక కోర్కెఁ దీర్పఁ, దం

డ్రిం దగఁ బుత్ర సచ్ఛతునినింగ నొనర్పఁగ, నట్లె రాఁగఁ దాఁ

జిందులు ద్రొక్కుచున్ "ముదిత! శ్రేష్ఠతమాంచిత సద్వరమ్మునున్

బొందియు వత్తువేల? యిఁకఁ బోఁగదె!" యంచు ననంగ, నామెయున్

"ముందుగ రెండు కోర్కెలిడి ముద్దునుఁ గూర్చితి విప్డు! నీ విఁకన్

వందన మంది, మూఁడవది వద్దనకుండ మహాత్మ, యీయు!" మం

చుం దన కోర్కి నీయుమన, సూర్యజుఁ డప్పుడు "సాధ్వి! నేఁడు నా

డెందము సంతసించె! నిదె డిగ్గన నిచ్చెద! నాథు ప్రాణముల్

వొందఁగఁ గోరఁబోక మఱి వొందుమ వేఱొక కోర్కి" నన్న నా

ముందఱ భర్తఁ గాంచియు, యమున్ దగఁ గోరెను "దండపాణి! నా

కుం దగు తోడుఁ గొంటి! మది కుందె! సుపుత్రుని నా కొసంగియున్

విందునుఁ గూర్చుమయ్య!" యన, వెంటనె దండి "తథాఽ"స్తనంగ, నా

నందముతోడ, "సౌరి! యెటు నందెద సంతతి? మానవాంగనల్

వొందెద రెట్లు సంతతిని వోఢను వీడియు లోకమం?"దనన్,

దొందరపాటుఁ గన్గొనియు దున్నవయాళికుఁ డంత "సాధ్వి! నీ

సుందర సూక్ష్మ వాక్ప్రతతిఁ జూడ మహాద్భుతమయ్యె! సంతసం

బందితిఁ! బుత్రపౌత్రయుతవై సుఖియింపుము భర్తతోడ! నే

నుం దగఁ బోయి నా విధులనుం దగఁ దీర్తు! శుభమ్ము నీ విలన్

బొందు!"మటంచు దీవెనలు పొందుగ నిచ్చి యగోచరుండయెన్!

జెందొవ చూపు లందముగఁ జిత్రపు నాట్యములాడఁ దాను స్వా

మిం దమితోడఁ జూచుచు గమించిన తత్కథనంత భర్తకున్

సుందరమైన రీతి వినసొంపగునట్లు వచించె! నిర్వురున్

మందగమమ్ములేక కర మందిరి భోగము పూర్వ రీతిగన్!!

-:శుభం భూయాత్:-

సమస్య: రామునకె చెందు నెల్లప్డు రాధ వలపు!

తేది: సెప్టెంబర్ 10, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

ప్రణయి రాధకుం గృష్ణుని ♦ వశ్యతఁ గన,

భక్తి నమలిన శృంగార ♦ సక్తత మదిఁ

దనరుచుండెడు సద్భక్త♦జన మనోఽభి

రామునకె చెందు నెల్లప్డు ♦ రాధ వలపు!!

సమస్య: కాంతా రమ్మనెను మోక్షకాముకుఁడు తమిన్!

తేది: సెప్టెంబర్ 09, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(భవబంధనము లిఁక వలదని యొక మోక్షకాముకుఁ డనంతుని యందు మనస్సును లగ్నము చేసినవాఁడై ముక్తికాంతనుఁ ద్వరగ రమ్మని పిలుచు సందర్భము)

సుంతయుఁ దాళక భక్తి న
నంతుని పద పద్మ సక్త నత మానస స
చ్చింతను "నో నిశ్శ్రేయస
కాంతా! ర" మ్మనెను మోక్షకాముకుఁడు తమిన్!!

సమస్య: దేవుఁడే లేఁ డనెడువాఁడు దేవుఁ డయ్యె!

తేది: సెప్టెంబర్ 08, 2015 నాటి శంకరాభరణంలోని సమస్యాపూరణం శీర్షికన ఈయబడిన సమస్యకు నా పూరణము

(నాస్తికునిగ జీవించి స్వర్గస్థుఁడైన తన పతినిం గూర్చి చింతించుచు నతని ఛాయాచిత్రమునకు నమస్కరించుచుఁ బల్కిన భార్య పలుకులు)

"జనుల సృష్టించి పోషించి సమయఁజేయు

విశ్వవిభు విశ్వసింపక, వెక్కిరించి,

’దేవుఁడే లేఁ’ డనెడువాఁడు, దేవుఁ డయ్యెఁ,

జిత్రపటమునకెక్కి పూజింపఁబడియె!"