మహిషాసుర మర్దినీ స్తుతి!

మిత్రులందఱకు

విజయ దశమి పర్వదిన

శుభాకాంక్షలు!

సురనర్తకీ/తరంగక వృత్తము(షట్పాది):

ఇందిరా రమణ సోదరీ! హిమజ! ♦ హిండి! చండి! ఖల శోషిణీ!

నందయంతి! గిరిజా! మదోత్కట! మ♦నస్వినీ! దనుజ నాశినీ!

నందితాఖిల సురేంద్ర ముఖ్య! కరు♦ణాంతరంగ! వరదాయినీ!

కందుకాభ పరిపంథి శీర్ష కర ♦ ఖండితోగ్ర! మృగవాహినీ!

వందితోరుతర భూజనాళి నత ♦ భక్తిమస్త! నగనందినీ!

మందయాన! పరమార్థ దాయిని! న♦మః సతీ! మహిష మర్దినీ!

సీ.      ఓంకార రూపిణీ! ♦ యోగీశ తోషిణీ! - దివిజ సంస్తుత గాత్రి! ♦ త్రిపుర హంత్రి!

ఐంకార రూపిణీ! ♦ ఆనంద పోషణీ! - షడ్భుజాయుధ ధాత్రి! ♦ శైల పుత్రి!

హ్రీంకార రూపిణీ! ♦ త్రిపథ సంచారిణీ! - సర్వార్థ దాత్రి! ప్ర♦శస్త గాత్రి!

శ్రీంకార రూపిణీ! ♦ శ్రితజన కళ్యాణి! - దనుజ నాశన కర్త్రి! ♦ తరళ నేత్రి!

గీ.      సర్వ మంత్రాత్మికా! కృపా ♦ శరధి! మాత! - సర్వ యంత్రాత్మికా! సర్వ ♦ శక్తిదాత!

సర్వ తంత్రాత్మికా! మహై♦శ్వర్య మహిత! - సర్వ లోకేశ్వరీ! తల్లి! ♦ సన్నుతు లివె!!

లక్ష్మీస్తుతి

మేఘవిస్ఫూర్జిత వృత్తము:

రమా! లక్ష్మీ! క్షీరాబ్ధ్యధిపతిసుతా! ♦ రమ్య! సంస్తుత్య వంద్యా!

నమో దేవీ! సంపత్ప్రద! సుచరితా! ♦ నన్ గటాక్షించు మాతా!

సమీక్షింతున్ పద్మాసన! సువదనా! ♦ సత్యమౌ నాదు భక్తిన్!

క్రమమ్మీవున్ సంపత్కరివి యవుటన్ ♦ గాంక్షితమ్మీవె తల్లీ!!

సరస్వతీ స్తుతి

కం.     విద్యాధినేత్రి! మాతా! - సద్యః స్ఫురణ ప్రదాత్రి! ♦ శారద! వాణీ!

మద్యోగ్య పద్య ధాత్రీ! - మాద్య న్మంగళ సుగాత్రి! ♦ మాన్య!నమస్తే!

తే.గీ.   సకల విద్యాప్రదాత్రి! వి♦శాలనేత్రి! - భ్రమరనీలవేణి స్వచ్ఛ♦వర్ణధాత్రి!

బ్రహ్మమానస సత్పుత్రి! ♦ స్వర సుగాత్రి! - బ్రాహ్మి! భగవతి! వరద! భా♦రతి నమోఽస్తు!

త్రిమాతృ స్తుతి

శా.      చేతన్ వీణ ధరించి, విద్యలొసఁగన్ ♦ శ్రీ వాణివై నిల్చి, స

చ్చేతోమోద విశేష సంపద లిడన్ ♦ శ్రీ లక్ష్మివై నిల్చి, యా

చేతోఽoశుల్ మొఱ వెట్ట; శక్తి నిడఁగన్ ♦ శ్రీ గౌరివై నిల్చి, స

చ్చైతన్య మ్మిడి, యో త్రిదేవి! యిట వి♦శ్వమ్మున్ దగన్ బ్రోవుమా!!

కం.     వాణీ! వీణా పాణీ! - పాణి స్థిత సకల విభవ ♦ భాస్వ ల్లక్ష్మీ

ప్రాణేశార్ధాజిర శ-ర్వాణీ! ధీ బల ధనాఢ్య! ♦ వరదాయి! భజే!!

ఉ.      అమ్మ! మనమ్మునందు నిను ♦ నండగ నమ్మితి! నమ్ము మమ్మ! మో

హమ్ముఁ బెకల్చి, సన్మనము ♦ నందఁగ నిచ్చి, హృదంతరమ్ము శాం

తమ్మున నోలలార్చి, సత♦తమ్ము దయారస మిమ్ముఁ గూర్చి, నా

కిమ్మహి జన్మ దున్మి, యిఁకఁ ♦ గేవల సద్గతి నిమ్మ! యమ్మరో!!

స్వస్తి

నా యితర బ్లాగులను వీక్షించడానికి క్లిక్ చేయండి:

అయుత మధుర కవితా స్రవంతి

బాలల పద్య కథలు

నా తెలంగాణ కోటి రత్నాల వీణ

విద్యాధనము (పద్యరూప సూక్తులు)

తేటగీతులు:

విద్య యున్నచో జీవన విధులు దెలియు!

లోక వృత్తమ్ము దాన విలోకన మగు!

విద్య లేకున్నఁ బ్రదికెడు విధ మెఱుఁగఁడు!

విద్య లేనట్టివాని జీవితము సున్న!!

విద్యలనుఁ బూర్ణుఁ డెపుడు గర్వితుఁడు కాఁడు;

స్వల్ప మెఱిఁగినవాఁడె గర్వమునుఁ జూపు;

నన్ని తెలియుటయే నిగర్వోన్నతి నిడుఁ;

గొన్ని తెలియుట గర్వానికున్న మహిమ!

ఎంత పండితుఁ డైనను నెంత విద్య

కల్గి యున్నను నిత్యమ్ము కాంక్ష తోడ

సాధనముఁ జేయకున్నచో సమయమునకు

నక్కఱకు రాదు! తద్జ్ఞాన మంతరించు!!

గురువు లెప్పుడు జ్ఞానమ్ముఁ గొనుచు నుండ

విద్యయే దీప్త మగుచుండు వేగముగను!

నిత్య విద్యార్థులై గురుల్ నిలిచినంత

భావి భారత పౌరులే పరిఢవింత్రు!!

బాలకులు బడులకుఁ బోయి భావి పౌరు

లుగను వెలుఁగొందు నట్టి విద్యఁ గొని వెలిఁగి

వెలుఁగు లోకానికినిఁ బంచి నిలువఁ గాను

జగము కీర్తించుఁ గావునఁ జదువ వలయు!!

అభ్యసనమునుఁ బట్టి విద్యయె యెసంగు!

కర్మమునుఁ బట్టి బుద్ధి సద్ఘనత పెరుఁగు!

సాధనము చేత సద్విద్య చాలఁ గలుగు!

పఱఁగ సద్బుద్ధి సత్కర్మ వలన నెసఁగు!!

నేర్చుకొనువాఁడు నిత్యమ్ము నేర్పుతోడ

శత్రువుల నుండి యైనను సద్గుణమ్ముఁ

గొనఁగఁ దగు నయ్య సేవించి వినియుఁ! గాన,

రిపుని నుండైన సచ్ఛీల మెపుడు కొనుఁడు!!

వినఁగ నిచ్ఛ లేకుంటయు; వేగిరపడు

టయును; నాత్మ శ్లాఘయను మూఁట నిల విద్య

నేర్వ నాటంకపఱచియు నిశ్చయముగ

విముఖులనుఁ జేయుఁ గావున వీడుఁ డివియ!!

పండితుఁడు లేని చోట నపండితుండె

గౌరవింపఁగఁ బడుచుండు ఘనముగాను!

వృక్షములు లేని చోటున వెదకిచూడ

నాముదపుఁ జెట్టె, వృక్షమ్మ టండ్రు జనులు!!

జ్ఞాన మెంతేని యున్నచో సర్వులకును

సుంతయైనను నుపయోగవంత మగుట

వలయు! నా జ్ఞాన ముపయోగపడదయేని

కుండలో దీప మున్నట్టు లుండునయ్య!!

పండితుని పరిశ్రమమునుఁ బండితుండె

తెలియఁగలఁడయ్య! యితరుండు తెలియఁగలఁడె?

పురిటి నొప్పులు తెలియును పుత్రవతికె!

బొట్టెలఁ గనని గొడ్రా లవెట్టు లెఱుఁగు?

పొత్తమునఁ గల విద్య యెప్పుడును నవస

రమున కెట్లొనరదొ యటు లక్కఱపడు

సమయమున ధనము పర హస్తమున నుండ

నెట్లు పనికివచ్చు? నెటులు హితము నిడును?

విద్య నొసఁగెడు గురుని సేవింపుమయ్య!

సూక్తి బోధకుఁ డగువాఁడె చుట్టమయ్య!

యెంచి సారము నెల్ల బోధించునట్టి

పెద్దలగువారి వాక్కులె చద్దిమూట!!

యుక్తియుక్తమౌ వాక్కు బాలోక్తమైనఁ

గొనఁగఁ దగునయ్య బుధులకుఁ గూర్మి మీఱ!

తపనుఁ డీక్షింపలేని పదార్థచయముఁ

చూపునుం గాదె యొకచిన్న దీపకళిక!!

స్వస్తి

గురుదేవులకు నతులు!

మిత్రులందఱకును

గురుపూజా దినోత్సవ శుభాకాంక్షలు!

చం.
ఇది యొకనాఁటి రాష్ట్రపతి కిష్ట మొసంగిన యట్టి దివ్యమౌ

సుదినము! తత్త్వశాస్త్ర ఘన శోభిత కీర్తి మహత్త్వపూర్ణ స

ద్వదనుఁడు పుట్టినట్టి గురు పర్వదినమ్ము! గురూత్తమాళికిన్

సదమల దివ్య సత్కృతుల సన్నుతు లిచ్చెడి వేళయే కదా!!

ఆ.వె.

చదువు నేర్చుకొనెడి సమయమందునఁ దాను

భోజనమునుఁ గూడ పొందలేక,

యరఁటియాఁకునుఁ గొను నార్థిక స్థితిలేక,

నేల పయినె తాఁ దినెనయ నాఁడు!

ఆ.వె.

శ్రద్ధతోడఁ దానుఁ జదువులు నేర్చియుఁ,

బండితుఁడయి, చదువు బాలకులకు

తత్త్వశాస్త్రబోధఁ దన్మయమ్మునఁజేసి,

వెలిఁగిపోయెనతఁడు పృథివిపయిని!

ఆ.వె.

పాఠ్యబోధనమును బాగైన రీతిలోఁ
గూర్మిమీఱ నేర్పు కోర్కి తోడఁ
బ్రతిదినమ్మునందుఁ బండ్రెండు గంటలు
చదివినాఁడతండు శ్రద్ధగాను!

ఆ.వె.

శ్రద్ధగాను విద్య చాలఁగ నేర్పుచుఁ

బ్రేమఁజూపి మిగులఁ బ్రియతముఁడయె!

బదిలియయ్యుఁ దాను పాఠితులను వీడ,

బండిలాగి ప్రేమఁ బంచిరయ్య!

ఆ.వె.

అంచెలంచెలుగను నభివృద్ధిచెందుచు

రాష్ట్రపతిగనయ్యు రమణమీఱ

నెవ్వరయిన నిటులె యెదిగిపోవుదురని

యెఱుక పఱచెనయ్య హితము మనకు!

ఆ.వె.

అతఁడు పుట్టినట్టి యా జన్మదినమును

శిష్యులంతయును విశిష్టముగను

జరుపుదుమని కోర; జన్మదినమ్మున

గురుదినోత్సవమ్ముఁ గోరె నతఁడు!

ఆ.వె.

అట్టి గురుఁడు పుట్టినట్టి యీ దినమున

గురువులందఱ నిల గుఱుతు సేసి,

పూజ సలుపఁ బొంగిపోయి, బాలలకును

దీవనలను నిడుదు స్థిరముగాను!

స్వస్తి

వినాయక మాహాత్మ్యం

మిత్రులందఱకు

వినాయక చవితి పర్వదిన

శుభాకాంక్షలు!

ఓం శ్రీ మహాగణాధిపతయే నమః

వినాయక జననము:

అల గజాసురు కోరిక ♦ నాదరించి,

యతని గర్భాన వసియించు ♦ హరుని, హరియ

తెచ్చుచున్నట్టివార్తయే ♦ తెలిసి, గౌరి

యమిత సంతోషమునుఁ బొందె ♦ నాత్మలోన!

ఆ మహాదేవుఁడును వచ్చు♦నంతలోనఁ

దాను సర్వాంగ సుందర ♦ దర్శితయయి

యామతింపఁగవలెనని ♦ యాత్మఁ దలఁచి,

స్నానమునకునుఁ జనఁగ నా♦శంసఁగొనెను!

ద్వారపాలన కొఱకయి ♦ తగ నలుఁగును

నలిపి బాలరూపము నిచ్చి, ♦ పులకితయయి,

ప్రాణమునుఁ బోసి, మ్రోల ని♦ల్పంగ, మిగుల

మాతృభావన కలిగియు ♦ మాత మురిసె!

బాలునకు వినాయక సమా♦హ్వయము నిడియు,

ద్వారమున నిలిపియుఁ జనెఁ ♦ దాను స్నాన

మాచరింపఁగ లోనికి; ♦ నంతలోన

శివుఁడు కైలాసమునకు వ♦చ్చెను బిరాన!

పార్వతియ బొమ్మఁ జేసియుఁ ♦ బ్రాణ మిడిన

బాలకుం డడ్డె! క్రోధాన ♦ వానిఁ దలను

ఖండనము సేసె శివుఁడు! దా♦క్షాయణీప్సి

తమ్ము నెఱవేర్ప నేనుఁగు ♦ తల నిడెనఁట!

అతఁడె విఘ్నేశ్వరుండయి ♦ హర్షమునను

బ్రజల పూజలఁ గొనియును ♦ వరములిడుచుఁ

దల్లిదండ్రుల దీవెనల్ ♦ దగఁగొనంగ

దండ నతులిడ నుదరమ్ము ♦ ధరణినంటి

యాడుచుండఁగఁ జంద్రుఁడే ♦ యపహసించె!

చవితి దినమున నవ్వంగఁ ♦ జందమామ,

కొడుకు గణనాథు నుదరమ్ము ♦ క్రుమ్మరించె

లోని కుడుముల, నుండ్రాళ్ళ; ♦ వానిఁ జూచి,

క్రోధమున శపించెను గౌరి ♦ బాధతోడ!

"చవితి దినమున నేవారు ♦ చంద్రుని ముఖ

దర్శనము సేతురో వారు ♦ తత్క్షణమ్మె

తగని నీలాపనిందల ♦ నెగడుదు"రని

యనఁగ, దేవతల్ ప్రార్థింప ♦ వినిచె నిట్లు;

"నాదు తనయునిఁ బూజించి, ♦ నాఁడు నక్ష

తలఁ దలపయిఁ జల్లుకొన నిం♦దలు తొలఁగి, శు

భమ్ము లొనఁగూడు" ననుచు శా♦పావధి నిడ,

నంద ఱానందమందిరి, ♦ వందనమిడి!

శ్రీకృష్ణుని చంద్రదర్శనము - నీలాపనిందలు:

అల వినాయక చవితి సా♦యంత్రమందుఁ

గృష్ణుఁ డొంటిగఁ దోఁట కేఁ♦గియు నచటనె

కూర్చొనఁగ రుక్మిణీసతి ♦ కూర్మిమీఱ

దుగ్ధ పాత్ర నొసఁగఁగ నం♦దునను నతఁడు

చంద్రుఁ బొడఁగాంచినంత ♦ సాక్షాత్కరించె

నింద; సత్రాజితుని దమ్ము♦నిం దునిమి, య

తని శమంతకమణిఁ గొనె ♦ ననుచు వేగ!

దైవమైననుఁ దలవ్రాఁతఁ ♦ దాఁటఁ గలఁడె?

(అది, ప్రసేనుండు ధరియించి ♦ యడవి కేఁగ,

సింగ మొక్కం డతనిఁ జంపి, ♦ చెలఁగి కొనఁగ,

జాంబవంతుండు సింహముం ♦ జంపి, దానిఁ

దనదు కొమరిత మెడలోనఁ ♦ దనర వైచె! )

దానఁ గృష్ణుండు వనికేఁగి, ♦ తఱచి వెదుక,

నొక్కచో జాంబవంతుని♦యొక్క తనయ

జాంబవతి కంఠమందున ♦ సౌరుల నిడు

నా శమంతకమణిఁ జూచి, ♦ యతనితోడ

యుద్ధముం జేసి, యోడించి, ♦ యుక్తముగను

జాంబవతితోడి మణిఁగొని, ♦ సరగునఁ జని,

యచట సాత్రాజితిం బొంది, ♦ యందగించె

విఘ్నపతి చల్లఁగాఁ జూడ ♦ వెన్నుఁడంత!

ఇట్టి కథవిన్నఁ జదివిన ♦ నెవరికైన

విఘ్ననాథుండు నిరతమ్ముఁ ♦ బ్రేమమీఱ

నాయురారోగ్య భోగభా♦గ్యైహికముల

నొసఁగి, ముక్తిని నిడుఁగాత ♦ యున్నతముగ!

స్వస్తి

ఓం శ్రీ మహాగణాధిపతయే నమః

శ్రీకృష్ణావతార వర్ణనము (పంచాశత్పాద మత్తేభవిక్రీడిత మాలిక)

ధరణీ భారము నుజ్జగింపఁగను స్వ♦త్వాంశాస్థ సంభూతుఁడై

చెఱసాలన్ జనియింప నా యమున గూ♦ర్చెన్ దారి వ్రేపల్లెకై

పరఁగన్ నందయశోద లింట నడుగుం ♦ బద్మమ్ములన్ మోపియున్

సరవిన్ బూతన పాలుఁ ద్రావి యుసురుల్ ♦ సర్వమ్ముఁ దాఁ బీల్చి, యెం

దఱు దుష్టాత్ములు నేఁగుదెంచి యతనిన్ ♦ దర్పోద్ధతిం జంపఁగా

విరచింపన్ బలు మాయలన్; విఱిచియున్, ♦ వేగమ్ముగన్ జంపి, సో

దర యుక్తుండయి వ్రేఁత లిండ్లఁ జని దు♦గ్ధమ్మంతయుం ద్రావ, స

త్వర మా బాలుని చేష్టలన్ని తెలుపన్, ♦ దన్మాత యా బాలునిన్

బరమాత్మున్ బసిబాలుఁ డంచుఁ దెలుపన్ ♦ వారందఱుం బోవ, నా

దరమెంతేఁ గనిపింప గోపిక లటన్ ♦ స్త్నానమ్ముఁ జేయంగ, ప

ల్వుర వల్వల్ దగ దొంగిలించియు వెసన్ ♦ భూజమ్ముపై దాఁచఁగన్

బరమాత్ముండని వారలంత కరముల్ ♦ పైకెత్తి దండమ్మిడన్

గరుణాత్ముండయి వారి కిచ్చె వలువల్, ♦ కైమోడ్పులం గొంచుఁ, దా

నరుదెంచెన్ బశుపాలనమ్మునకు స♦ఖ్యాళిం దగం గూడియున్

జిరకాలమ్మట బంతులాఁడు కలనన్, ♦ జిత్రమ్ముగా బంతి యా

సరసిన్ మున్గఁగఁ గృష్ణుఁ డప్డు మడువున్ ♦ జక్కంగఁ దా దూఁకఁగన్

సరసిం గాళియ సర్ప మప్పుడు హరిన్ ♦ జంపంగ నుంకించఁ, దా

నురుహస్తమ్మున ముష్టిఘాత మిడఁగా ♦ నుద్వేగ మెంతేని రా

నురగ మ్మప్పుడు కృష్ణుపైఁ దనదు దం♦ష్ట్రోత్సేక హాలాహలో

త్కరముల్ చిమ్మ యశోద సూనుఁ డపుడున్ ♦ దా వేగ సర్పమ్ముపై

నుఱికెన్ భోగము పైన నెక్కి నటరా♦జోత్తంస విద్వాంస రా

డ్వర నాట్యాంబుధి మున్గి ధింతకిట ధిం ♦ తద్ధింత తద్ధింత ధిం

ధిర ధిమ్మంచును నాట్యమాడ నపుడున్ ♦ దీనుండు కాళీయుఁ డా

దరమొప్పంగను "గావు" మంచుఁ బలికెన్ ♦ దర్పమ్ము సర్పమ్మునన్

దరలెన్; గర్వము ఖర్వమయ్యె, సతులున్ ♦ దర్జించి రా కాళియున్;

గరుణన్ వీడు మటంచుఁ బల్క నపు డా ♦ కాళీయ దర్పోర్జితుం

డురగమ్మున్ విడనాడి దూఁకె భువిపై ♦ దూరీకృతావేశుఁడై;

వరమిచ్చెన్ ’దన పాదముద్రఁ గని వే ♦ పక్షుల్ దొలంగున్ సదా

త్వరఁ బొ’మ్మంచును బల్కి, చేరె సఖులన్ ♦ వర్ణింప నా గాథనున్;

సరసీజాత సునేత్రుఁ డప్డు మఱలెన్ ♦ సభ్రాతృమిత్రాదుఁడై;

కరియానల్ మురళీరవమ్ము వినియున్ ♦ గానామృతమ్మానఁగన్

దరహాసాంబుధి ముంచి తేల్చి, దయతోఁ ♦ దన్వంగులం గూడి, వే

గిరమే కంసుని ప్రోలికిం జనియుఁ గ♦ల్కిం గుబ్జనున్ వేగ సుం

దరిగన్ జేసియు, హస్తిఁ దున్మి, జనుల♦త్యాదృత్యుదారాత్ములై

వఱలన్ జాణుర ముష్టికాఖ్యుల వధిం♦పన్ యుద్ధముం జేసి కూ

ల్చి రణౌత్సుక్యునిఁ గంసుఁ జంపియును ద♦ల్లిందండ్రినిన్ జేరి వే

చెఱసాలన్ వెడలించి, కొల్చి, మురిపిం♦చెన్ సేవ లందించియున్;

సరసీజాక్షిని రుక్మిణీ మణిని హృ♦త్స్థానమ్మునందున్ దగన్

బరిగృహ్యాంచితగా నొనర్చి వరుసన్ ♦ భార్యాష్టకుండయ్యు, స

ద్వరదుండయ్యెను పాండుభూపు తనయుల్ ♦ ధర్మాత్ములై కొల్వఁగన్

నరు సారథ్యముఁ జేసి కూర్మి సలహా ♦ నందించి గెల్పొందఁగన్

కురువీరుల్ తమయంతఁ దాము తొలఁగన్ ♦ గోపాలుఁడే పూని యు

ర్వరనున్ గెల్వఁగఁ జేసెఁ; బుట్టి ముసలం♦బా యాదవామ్నాయమున్

బరిమార్పన్ సమకట్ట, నప్డు, మునిశా♦పమ్మున్ మదిం గాంచియున్

జరియింపంగను లేక తాను వనిలో ♦ శయ్యావిలోలుండయెన్;

శరమున్ వేయఁ గిరాతుఁ డొక్కఁ డట, వి♦శ్వాకారుఁ డా వెంటనే

సరవిన్ జన్మ సమాప్త మౌట, వెడలెన్ ♦ సర్వేశుఁ డా చక్రియున్

వర వైకుంఠముఁ జేరె! నట్టి ఘనుఁడౌ ♦ పక్షీంద్ర యానుండు శ్రీ

హరి విశ్వాత్ముఁడు పద్మనాభుఁడు నిలిం♦పారాతివైరుండు శా

ర్ఙ్గి రమానాథుఁడు పాంశుజాలికుఁడు పుం♦డ్రేక్షుండు మమ్మోమెడున్!

-:శుభం భూయాత్:-

చనుఁబాలు ద్రావు బిడ్డఁడే!...ఐనా....!!!

అందఱకు శ్రీకృష్ణ జన్మాష్టమి శుభాకాంక్షలు!

కం.
చనుఁబాలు ద్రావు బిడ్డఁడు
తన కటినిం గట్టు ఱోటి ♦ త్రాటిం దిగువన్
బెను మ్రాఁకులుఁ గూల నపుడు
ఘన విస్మితులయి నిలిచిరి ♦ గంధర్వులటన్!


కం.
"చనుఁబాలు ద్రావు బిడ్డఁడె?
ఘన దైవమ్మగును కాని, ♦ కాఁడయ శిశువే"
యని వల్లవు లత్తఱిఁ దమ
మనవినిఁ దెల్పంగఁ జనిరి ♦ మాతఁ బిలువఁగన్!!


కం.
చనుఁబాలు ద్రావు బిడ్డఁడు
ఘనులౌ వేల్పులకు ముక్తిఁ ♦ గల్పింపంగన్
మనమునఁ బొంగి యశోదయె
తన యెదకును హత్తుకొనియె ♦ దబ్బున శిశువున్!!


కం.
"చనుఁబాలు ద్రావు బిడ్డఁడె
కనఁగను విష్ణుండు నృహరి ♦ ఘనుఁడౌ మధుసూ
దనుఁ" డని రట గంధర్వులు
చనఁ బురికిని గృష్ణు నెదుటఁ ♦ జాఁగిలఁబడుచున్!!


కం.
చనుఁబాలు ద్రావు బిడ్డఁడు
జన మనముల దోచి వెల్గె ♦ శాశ్వతుఁ డనఁగన్
విన వేడుకయ్యెఁ దల్లికిఁ
దనువే పులకించి జన్మ ♦ తరియించె వెసన్!!

స్వస్తి

సర్వదేవ కృత శ్రీ లక్ష్మీ స్తోత్రము (తెనుఁగు అనువాదము)

"క్షమ నొసంగుము భగవతీ! కమల లక్ష్మి

శుద్ధ సత్త్వస్వరూపిణీ శోభితాంఘ్రి

కోపపరివర్జితా సృత్వరీ పరాత్ప

రీ క్షమాశీలి తాపహంత్రీ నమోఽస్తు! 1

సర్వ సాధ్వులలో సాధ్వి, సర్వ రూప

వతులలో రూపవతివి నీవమ్మ! నీవు

లేనిచో జగమంతయుఁ బ్రేత సమమ

గుచును నిష్ఫలమ్మగునమ్మ! కూర్మినిమ్మ! 2

సకల సంపత్స్వరూపవు, సర్వరూప

వీవె! రాసేశ్వరుల యధిదేవి వీవె!

సకల సతులందు నీ కళ సంక్రమించు!

లేరు నిను మించు దేవత లిజ్జగమున! 3

నీవె కైలాసమున శివానివిగఁ, బాల

కడలిలో సింధుసుతగ, స్వర్గమ్మునందు

స్వర్గ లక్ష్మిగా, భూతలోపరిని మర్త్య

లక్ష్మిగా వెలుఁగుదువమ్మ! రాఁగదమ్మ! 4

నీవె వైకుంఠమున లక్ష్మి! వీవె దేవ

దేవి, తులసి, సరస్వతీదేవి, గంగ;

వీవు సావిత్రివే గద విశ్వసృజుని

లోకమునఁ గన, నో తల్లి, నీకు నతులు! 5

నీవె కృష్ణుని ప్రాణాధిదేవతగను,

ప్రధిత గోలోకమున స్వయం రాధికగను

ధన్యత నిడియు, వెలయ బృందావనమున

బృంద; రాసాన రాసేశ్వరివయితీవె! 6

నవ్య భాండీరముననుఁ గృష్ణప్రియవయి,

చందన వనానఁ జంద్రవై, చంపకవన

మందు విరజవై, శతశృంగమందు నీవె

సుందరివయి వెల్గితివమ్మ సుకరముగను! 7

పద్మవనమున నవ పద్మవయ్యు, మాల

తీ వనమ్మున నవ మాలతివయి, కుంద

వనమునం గుందదంతివై తనరి, మిగుల

స్థిరతఁ గేతకీ వనిని సుశీలవైతి! 8

తగఁ గదంబ వనమునఁ గదంబమాల,

రాజగృహమున ఘన రాజలక్ష్మి, యటులె

ప్రతి గృహమ్మున గృహలక్ష్మి వలెను నిలిచి

పూజలను గొనుచుందువు పుడమిపయిని! 9

అంబుజాసనాతిచరాబ్ధిజామలేంది

రేశ్వరీ కమలాలయా శ్రీద విష్ణు

వల్లభా రమా మాధవీ వాహినీశ

నందినీ మారజననీ వినమ్ర నతులు!" 10

అనుచు దేవతల్, మునులును, మనుజులంత

నమ్రవదనులై భక్తితో నతులు సేసి,

శుభ్రకంఠోష్ఠతాలువుల్ శోభిలంగఁ

బ్రార్థనము సేసి తరియించ్రి రమణమీఱ! 11

ఇట్టి లక్ష్మీస్తవమ్మును నెవ్వఁ డుదయ

మునను భక్తిఁ బఠించు, నతనికి నెపుడు

ధ్రువముగాఁ బుణ్యములు శుభా లొదవునట్లు

తల్లి లక్ష్మియే కరుణించుఁ దనివితీఱ! 12

స్వస్తి