పద్యరచన: భానుఁడు...భామినీ శ్వేతపద్మము

తేది: ఆగస్టు 28, 2012 నాటి శంకరాభరణంలోని పద్యరచన శీర్షికన ఇచ్చిన చిత్రమునకు నేను రాసిన పద్యములు

ఆ.వె.
భానుఁ డుదయ మందె! భామినీ శ్వేత ప
ద్మమ్ము వికసనమునఁ దగ హసించె!
రమ్యమైన యట్టి రంగస్థలమ్మదె;
భాను భామినులకుఁ బ్రణయ కేళి!(1)

తే.గీ.
పత్ర రచిత వలయ శుభ ప్రాంగణమున
సూత్రధారుండు సూర్యుండు సుప్రభాత
గీతములు పాడ నేతెంచె కేళి కొఱకు!
రమణి ముఖపద్మము విరిసె రమణుఁ జూచి!!(2)

కం.
రమణి యఁట పుండరీకము;
సుమనోహర సూత్రధారి సూర్యుం డటకున్
రమణీయముగా ప్రణిధా
నము సేయఁగ బిడియమందె నళినమ్మపుడున్!(3)

తే.గీ.
రమణుఁ డంతట నునుముద్దు రమణి కిడఁగ,
ముఖము విప్పారె; సొబగులు మురిపెము లిడె!
ప్రకృతి కాంతాస్య మోహన రాగ యతికిఁ
జూపఱ సరసిక హృదయ సుమము విరిసె!!(4)

కం.
రమణీయ దృశ్యకావ్యము
కమనీయముగానుఁ దోచుఁ గవి మిత్రులకున్!
సమయమ్మిదె వర్ణనమున
సుమనోహర ధవళవర్ణ సుమ సరసి కడన్!!